EUSKAL HERRIKO UNIBERTSITATEKO 2007KO TITULUDUNEN %79,2K LANA AURKITU ZUEN GRADUATU ETA SEI HILABETERA 14.07.11

 “Euskal unibertsitate-ikasleen laneratze-maila handiak prestakuntza‑maila handieneko enpleguek krisialdiaren ondorioei hobeto eusten dietela berresten du” azpimarratu du Gemma Zabaleta sailburuak”

2007. urtean lizentziatu ziren Euskal Herriko Unibertsitateko (EHU) unibertsitarioen laneratze-mailari buruz Lanbide-Euskal Enplegu Zerbitzuko teknikarien kabineteak egindako azterlanaren emaitzak aurkeztu ditu gaur goizean, Bilbon, Gemma Zabaleta Enplegu eta Gizarte Gaietako sailburuak. Euskal Herriko Unibertsitatean 2007. urtean titulua lortu duen Promozioaren Laneratzeari buruzko Azterlana egiteko, urte hartan Euskadiko unibertsitate publikoan graduatu ziren 5.667 lizentziaturen iritzia jaso zen. Aurkezpen-ekitaldian parte hartu dute, halaber, Iñaki Goirizelaia EHUko errektoreak eta José Manuel De La Sen EHUko Gizarte Kontseiluko presidenteak.

 2007ko promozioaren lagina osatzeko elkarrizketak 2010eko azarotik 2011ko urtarrilera egin ziren, eta lagin hori ikasturte akademiko osora estrapolatzen da (7.265 graduatu eta 78 titulazio). Horietatik %62 emakumeak dira eta %38 gizonak, azken hamarkada osoan proportzio horri eutsi egin zaio, Euskal Estatistika Erakundearen (EUSTAT) arabera.

 Ikasle haien enplegu-tasa %79,2koa da; beraz, 1,2 hamarreneko jaitsiera izan du, aurreko promozioko datuekin alderatuta. Alabaina, txostenak agerian uzten duenez, unibertsitate-karrera amaitu eta lehenengo enplegua aurkitu arteko batez besteko epea murriztu egin da. 2007ko promozioaren kasuan, epe hori sei hilabetekoa da, aurreko urtean baino bat gutxiago. 

 Bizitza aktiboan sartzeari buruzko azterlanaren datuek argi eta garbi adierazten dute 2008ko azken hiruhilekotik EAEn gertatzen ari den atzeraldiaren eta enplegu-suntsipenaren hasiera. Izan ere, oraindik ere hazkundekoa zen eta igurikimen onak zituen etapan atera zen lan-merkatura urte hartan lizentziatu zen promozioa, krisialdiak EAE bete-betean harrapatu baino urte eta erdi eskas lehenago.

 Datu garrantzitsuenen artean, honako hauek nabarmendu behar dira:

• Enplegu-tasa %79,2koa da. Horrela, aurreko promozioarena baino 1,2 hamarren apalagoa da.
• Karrera amaitu eta lehenengo enplegua aurkitu arteko epea sei hilabetekoa da. 2006ko ikasturtean baino hilabete gutxiago.
• Jarduera-tasa %92,2koa da. Hau da, hamar lizentziatutik bederatzik lan-bilaketari ekin zioten unibertsitate-titulua lortu bezain laster. 
• Ondo kokatutako enpleguak antzeko mailan jarraitzen du, %87an. Horrez esan nahi du enplegua lortu duten hamar unibertsitarioetatik bederatzik beren maila akademikoarekin bat datorren lanpostuan dihardutela. Datu hori aurreko urtekoa baino bi puntu txikiagoa da, baina 1998. urtean egindako lehenengo inkestan lortutakoa baino 14,4 puntu handiagoa da.
• Antzeko ehunekoetan jarraitzen dute unibertsitate-titulua eskatzen den enpleguak (%84), eta unibertsitate-prestakuntzari lotutako egitekoak dituenak (%79).
• Enplegu egonkorra (mugagabeko kontratuak, autonomoak eta kooperatibetako bazkideak) %49koa da; beraz, lau puntuko jaitsiera izan du aurreko azterlanaren aldean.  
• Beren kontra lan egiten dutenak alde batera utzita (autonomoak, enplegatzaileak eta bazkide kooperatibista), kontratu finkoa duten soldatapekoak %46 dira, 2006ko promozioan baino hiru puntu gutxiago.
• Jarduera ekonomikoko sektoreetan gizonen eta emakumeen artean dagoen banaketa desberdinak eta industriaren sektoreak izan duen bilakaera hobeak azaltzen dute gizonek lidergoa berreskuratu izanaren zergatia, bai enplegu tasa orokorretan (%80,4 gizonen artean eta %79,5 emakumeen artean), baita langabezia tasan ere (%14,8 gizonen artean eta %14,4 emakumeen artean).
• Hilabeteko batez besteko diru-sarrera garbia 1.505 eurokoa da, urtean 14 sari eta lanaldi osoz kalkulatuta. Gizonezkoek hilean 1.583 euro jasotzen dituzte batez beste, eta emakumeek 1.453.

“Euskal unibertsitate-ikasleen laneratze-maila handiak prestakuntza‑maila handieneko enpleguek krisialdiaren ondorioei hobeto eusten dietela berresten du”, azpimarratu du Enplegu eta Gizarte Gaietako sailburuak, Iñaki Goirizelaia EHUko errektorearekin batera datuak aurkezterakoan. Bestalde, Goirizelaiak gogora ekarri duenez “Zenbat eta prestakuntza handiagoa izan, aukera gehiago daude lana aurkitzeko. Printzipio hori eztabaidaezina da, eta era guztietako azterlanetan berresten da urtero. Eta urtero Jaurlaritzak, Lanbideren bitartez, plazaratzen duen txostenean ere berresten da aipatutako printzipioa. Ageriko datu horretatik ondorio garrantzitsuak atera beharko genituzke: unibertsitatearen aldeko apustua apustu soziala da, dimentsio kolektiboa duena; baina, ikuspuntu pertsonaletik, unibertsitatearen aldeko apustua etorkizun profesional kualifikatuago baten aldeko apustua ere bada”.

 2007ko promozioak betetzen dituen enpleguen kalitate-adierazleek ere tesi hori indartzen dute. Aurreko promozioei eginiko jarraipenean doikuntza gero eta handiagoa ikusten zen unibertsitate-ikasleen prestakuntza mailaren eta okupaturiko lanpostuari loturiko prestakuntza-mailaren artean. Joera horrekin batera goi-prestakuntzako okupazioan gero eta presentzia handiagoa izan da Euskadiko okupazioen guztizkoaren gain.

Ildo horretan, Gemma Zabaleta sailburuak adierazi duenez, “enplegu-galera lanbide-kategoria guztietan eta askotariko okupazioetan gertatzen bada ere, indar handiagoarekin gertatu da maila profesional ertain-baxuekin eta prestakuntza apaleneko okupazioetan, eta eragin txikiagoa izan du prestakuntza-goreneko lanbide-mailetan”. Unibertsitateko tituludunen enplegu-tasa 31 puntu handiagoa da lehen ikasketak bakarrik dituztenena baino, eta 5,7 puntu handiagoa bigarren ikasketak dituztenena baino.

Soldatak

Aurreko urtean, krisiak industriaren eta eraikuntzaren sektoreetan izan zuen eraginaren ondorioz, lehenengo aldiz emakumeek enplegu-tasa handiagoak eta langabezia-maila txikiagoa izan zituzten gizonek baino; izan ere, bi sektore horietan oso handia baita gizonezkoen parte hartzea. Aztertzen ari garen urtean, berriz, nahiz eta aldeak txikiak diren, gizonezkoek enplegu-tasa handiagoa dute berriro (%80,4 eta %79,5, hurrenez hurren), eta langabezia gutxiago (%14,8 eta %14,4).

“Dena den, gizonen eta emakumeen arteko kalitate-maila desberdinek irauten dute, gizonek okupaturiko enpleguak beren prestakuntza-mailarekiko duten doikuntza-maila handiagoari dagokionez zein soldatan edo lan-egonkortasunean”, sailburuak zehaztu duenez. Esaterako, soldatari dagokionez, inkestak adierazten du gizonek hilean batez beste 1.583 euroko diru-sarrera garbia jasotzen dutela eta emakumeek, aldiz, 1.453 eurokoa. Aldea, beraz, hilean 130 eurokoa da.

Jarduera-tasa handienak osasunarekin lotutako ikasketetan (%90) eta karrera teknikoetan (%83) aurkitzen da; eta txikiena Giza Zientzien alorrean (%68). Aipagarria da ziklo luzeko lizentziaturek eta ingeniaritzek emaitza hobeak dituztela diplomaturek edo ingeniaritza teknikoek baino.

Osasunaren arloko jarduerak dira, halaber, hobekien ordaindurikoak (1.838 euro garbi hilean x 14 paga). Inkesta egin zenean, ikasketak amaitu eta lehenengo enplegua lortu arteko batez besteko denbora lan-esperientzia zuen biztanleria aktiboarentzat sei hilabetekoa izan da, 2006ko promozioarenaren baino hilabete bat laburragoa.

Lana duten 2006ko lizentziatu edo diplomatuen %10,9k euskal autonomia erkidegotik kanpo lan egiten dute. Beste autonomia erkidego batera joan dira  %8,2, eta %2,7 beste herrialde batera, batez ere Europaren barruan. Erasmus eta bestelako gradu‑ondoko programak —lanbide-babes handiagoari lotutakoak horik guztiak— mugikortasun horren aldeko eragile dira.

Bestalde, José Manuel De La Senek gogora ekarri duenez, “EHUk gaitasun handiko tituludunak dakarzkio gizarteari, baina gizarteak, enpresek eta Unibertsitateak elkarrekin lan egin behar dute, harreman egonkor eta sendoak ezarriz, tituludunek lan‑mundurako bidea azkar, erraz eta zuzenean egin dezaten”.

 “Horrez gain, egun lan egiten duten enpresetan bete behar dituzten egikizunetarako ikasitakoaren erabilgarritasunaz tituludunek egiten duten balorazioen ere hobetu egin dugu, eta horrek bereziki pozten nau. Salbuespen bakarra atzerriko hizkuntzetan jasotako prestakuntza izan da, eta alderdi hori hobetu behar dugu; izan ere, erabakigarria baita tituludunen gaitasun profesionalean”, azpimarratu du.

DATORREN URTERAKO EHU-REN ESKAINTZAN 3 GRADU ETA 12 MASTER EZARTZEA ONARTU DU GIZARTE-KONTSEILUAK 14.07.11

2011-2012 ikasturterako eskaintza 69 gradu eta 102 masterrekoa izango da

Gaur Bilbon egin den EHU-ren Gizarte Kontseiluaren Osoko Bilkuran, Hezkuntza, Unibertsitate eta Ikerketa Sailari 3 gradu-titulazio eta 13 master ofizial berri ezartzea proposatu zaio; horrekin, 2011-2012 ikasturterako euskal unibertsitate publikoaren eskaintza 102 unibertsitate-masterrekoa eta 69 gradukoa izango da. 

Gizarte Kontseiluak onartutako gradu-titulu berriak Fisioterapia, Energia Berriztagarrien Ingeniaritza eta Arkitekturaren Oinarriak dira. Azken horrek orain arte irakasten zen Arkitekturako Gradua ordezten du, EDU/2075/2010 Ministerio Aginduan xedatutakora doitzeko. Horretan, arkitekto-lanbidean jarduteko gaitzen duten unibertsitate-titulu ofizialetarako baldintzak ezartzen dira. EHU-n ezartzekoa den Arkitekturaren Oinarrien Gradu berria 300 kredituz osatuta dago eta ez ditu atribuzio profesionalak ematen. 

Gradu osteko 12 master ofizial berriei dagokienez, orotariko ezagutza-arloak barne hartzen dituzte, hala nola: egungo artea kontserbatzea, ikertzea eta erakustea; zeramika; sektore turistikoko diseinua; mundu klasikoa; eredugintza konputazionala; hezkuntzako hizkuntza-aniztasuna ikertzea; lengoaiaren neurozientzia kognitiboa; enpresa-abokatutza; ingeniaritza fisikoa; integrazio politikoa eta batasun ekonomikoa Europar Batasunean; edo material berriztagarrien ingeniaritza. Master berrietako lau unibertsitate artekoak dira eta horietako bi atzerriko unibertsitateekin antolatzen dira. 

Halaber, Osoko Bilkurak berezko 42 tituluren matrikula-prezioak ere finkatu ditu eta erabaki du, gehienek (zehazki, 27k) aurreko ikasturteko tasak mantenduko dituztela eta beste zortzik, berriz, prezioak igoko dituztela. Gainerako 7 tituluak berriki sortu dira eta honako prezio hauek izango dituzte: 

Horren harira, Kontseiluak ikasketa osagarrien hiru ikastaroren matrikula-prezioak ere finkatu ditu: “Emulsion Polymerization Processes” ikastaroari 471,70 euroko prezioa ezarri zaio; “CAD/CAE. Ingeniaritza, kalkulu eta elementu infinituen bidezko simulazio numerikoko ikastaro aurreratua” ikastaroari 35,00 euro/kreditu prezioa ezarri zaio; eta “Ordenagailuz lagundutako diseinu- eta fabrikazio-ingeniaritza” ikastaroari 60,00 euro/kreditu prezioa ezarri zaio.

Lankidetza-bekak 

Halaber, Kontseiluak Eusko Jaurlaritzaren Hezkuntza, Unibertsitate eta Ikerketa Sailak eta Hezkuntza eta Zientzia Ministerioak deitutako lankidetza-bekak banatzeko irizpideak unibertsitateko sailen arabera adostu ditu. Banaketa hori egiteko, kontuan hartuko dira ikasle eskatzaileek espediente akademikoan lortutako puntuak (% 70) eta lankidetzan aritzea eskatzen duen unibertsitate-sailaren ekoizpen zientifikoko baremoen aplikazioak ezarritako ordena, G9 Unibertsitate Taldeak onartu bezala (% 30). 

Euskampus Fundazioan parte hartzea 

Azkenik, Gizarte Kontseiluaren Osoko Bilkurak Euskal Herriko Unibertsitateak Euskampus Fundazioan parte har dezan onartu du, berebiziko pieza delako 2010eko urrian, EHUren nazioarteko batzorde bat Nazioarteko Bikaintasuneko Campus izendatu zenean Hezkuntza Ministerioaren deialdiaren barruan, martxan jarri zen CEI proiektua garatzeko.

 CEI gisa bereizten diren unibertsitateentzako Ministerioak emandako funtsetako 5 milioi euroko aurrekontuarekin, Euskampus Fundazioak Parke Zientifikoan Biofisika Zentroa eraikitzen parte hartuko du eta oso jarduera garrantzitsuak garatuko ditu, hala nola mugaz gaindiko campusa finkatzea Bordeleko Unibertsitatearekin, proiektua nazioartean sustatzea sareak sortuz, edo mugikortasuna eta ekimenak sustatzea. Ez da ahaztu behar ikerketa kooperatiboaren sustapena eta Euskampus sareko eragileen berrikuntza. 

Azkenik, Lanbidek 2007ko promozioari dagokion EHU-ko tituludunak Bizitza Aktibora Igarotzeari buruzko azterketa aurkeztu du. Behatoki hori Gizarte Kontseiluak sustatu du eta jadanik unibertsitate-tituludunen hamar promozio aztertu ditu. Horri esker, Unibertsitateak eskaintzen duen zerbitzu publikoa hobetzeko balio dezaketen lan-merkatuari buruzko datu fidagarri, kontrastagarri eta aztergarriak lortu dira.

GIZARTE-KONTSEILUAK EHU-REN HELBURU SOZIALEN BETETZE-MAILA NEURTZEN DUEN KONTU EMATEKO ADIERAZLE-SISTEMAREN INFORMAZIOA AZTERTU DU 11.05.11

Sistema osatzen duten 20 adierazleetatik, 12k hobera egin dute eta 8n, berriz, hobetu beharreko esparruak hauteman dira

Gaur Bilbon egin den Gizarte Kontseiluaren Osoko Bilkuran “Gizarteari kontu emateko EHUren adierazleen sistemak” lortutako datuak aztertu ditu. Horri esker, Unibertsitateak helburu sozialetan izandako betetze-maila neur daiteke, Gizarte Kontseiluari kontu emateko betebeharraren esparruan. Azterketak agerian uzten du, sistema osatzen duten 20 adierazleen sortatik, EHU hobetu egin dela 12an eta beste 8n, berriz, hobetu beharreko esparruak hauteman direla.

Aipatutako adierazle-sistemaren helburua, Gizarte Kontseiluaren bitartez, gizarteari informazioa eskaintzea da EHUren emaitzei, ekarritako balioari eta helburuen betetze-mailari buruz. Halaber, unibertsitate-zerbitzuen jarduera ebaluatzea ahalbidetzen du, orobat antzeko ezaugarriak dituzten beste unibertsitate batzuekin konparatzea. Sistema oinarrizko 20 adierazleren sorta batez osatuta dago eta, horiek, EHUren irudi zehatza ematen dute zortzi arlo gakotan: ingurunea, ospea, sartze-maila, prestakuntza, ingurunearekiko egokitzapena, ikerketa, hizkuntza-normalizazioa eta gizarte-ardura.

Azken azterketaren arabera, hobetu diren adierazleak hauek dira:

• Lehen eta bigarren zikloetan matrikulatutako ikasle atzerritarren tasa
• Abandonu-tasa
• Master Ofizialetan atzerriko unibertsitatetik datozen ikasleen tasa
• Estaldura-tasa eta matrikula/eskaintza ratioa
• Arrakasta-tasa
• Pertsona tituludunek jasotako gaitasunen erabilgarritasunari buruz egindako balorazioa
• Lortutako enplegu-tasa (2006ko promozioa)
• Lehen enplegura arte igarotako denbora
• Zuzeneko kontratazioko diru-sarreren tasa
• Tesiko irakasle eta ikertzaile kopurua
• Patente-eskaerak, milioi biztanleko
• Emakumezko irakasle eta ikertzaile doktoreen tasa

Bestalde, zortzi adierazlek hobetu beharreko arloak adierazten dituzte:

• Gastu arruntei buruzko transferentzia arruntak
• Ikasleko gastu arrunta
• Kalitate-aipamena duten doktoretzen proportzioa
• Errendimendu-tasa
• Enpresetako praktiken gauzatze-tasa
• Ekoizpen zientifikoa, irakasle edo ikertzaile doktoreko
• Lehen eta bigarren zikloan euskaraz eskaintzen diren kredituen tasa
• Lehen eta bigarren zikloko emakumezko ikasleen tasa

Kontu-emateko adierazle-sistemaren 2011ko azken txostenean adierazleen sortaren berrikuspena ere barne hartzen da, Unibertsitate Kontseiluaren eta Unibertsitate Politikaren Konferentzia Orokorraren proposamen irekia kontuan hartuta. Nahiz eta bi sistemen xehetasun-maila ez den konparagarria, txostenak ondorioztatzen du euskal unibertsitate publikoan indartu egin behar dela mugikortasunari loturiko adierazleen esparrua. Horrela, horren oinarrian, azterketak honako aldaketa hauek eragiten ditu:

• • “Unibertsitatearen irudia eta ospea” blokean, “EAEko biztanleek EHUri buruz duten iritzia” adierazlea desagerrarazi da (datuak Euskobarometrokoak ziren eta horrek 2006tik ez du alderdi hori barne hartzen). Horren ordez, Lehen eta bigarren zikloan matrikulatutako ikasle atzerritarren tasa jarri da, mugikortasunean jarritako arreta indartzeko eta EHUren erakartze-gaitasunarekin eta, ondorioz, ospearekin, lotuta baitago.
• • Doktoretza egiten ari diren eta atzerriko unibertsitateetatik datozen ikasleei buruzko datua ez dugunez (informazio hori, orain arte, Euskal Herriko Unibertsitatea Zifratan azterketan jasotzen zen), adierazlea “Master ofizialak egiten ari diren atzerriko unibertsitateetako ikasleen tasa” gisa birformulatuko da.
• • Azkenik, patente-eskaerei buruzko adierazlea birdefinitu egin da. Lehen, EHUk eskatutakoak adierazten zituen, unibertsitate publikoek aurkeztutako patenteen guztizkoarekiko eta orain, berriz, milioi biztanleko eskaera gisa adierazten da (Unibertsitateen Kontseiluaren eta Errektoreen Konferentziak proposatzen duten moduan).

Adierazleen sistema horri eta jasotako informazioaren segimendu sistematikoari esker, Gizarte Kontseiluak eta Unibertsitateak berak denboran izandako hobekuntza-maila egiaztatu dezakete eta ikus dezakete planteatutako helburuak lortu al diren. Halaber, emaitzak eta horien eboluzioa erreferentziazko beste unibertsitate batzuenekin konpara daitezke.

Ikasketen prezioak

Bestalde, tasa akademikoei dagokienez, Osoko Bilkurak 11 ikastaro osagarriren prezioak baliozkotu ditu, Kontseiluak berak 2008ko otsailean ezarritako irizpideetara egokituta. Horrela, 10 kreditu baino gutxiagoko ikastaroek ezin dute izan 200 euro/kreditu baino garestiagoak. Gizarte Kontseiluaren Osoko Bilkuraren akordioak ezartzen du ikasketa horien prezioak 6 euro/kreditu, Bioelektronikaren Ikasketetarako Elementu Fisiko-matematikoak ikastarorako, eta 190 euro/kreditu, REACH Arautegiaren Hastapenak ikastarorako, bitartekoak izango direla.

Kontseiluak zenbait ondare-jarduera ere onartu ditu (bereizketa, indibisoa iraungitzea eta lehengoratze-karga hedatzea), Bilboko Ekipamendu Esparruaren A Lursaila deritzonean garai batean Bilboko nazioarteko erakustazoka zenaren finkaren jabetzatik UPV/EHUri dagokion % 9 kontzentratzeko. Horretan, gaur egun, Ingeniaritza Teknikoen unibertsitate-eraikina eraikitzen ari dira.

Azkenik, Osoko Bilkurak Kontseiluaren finantza-informazioaren egoerak aztertu ditu, irakasleen zenbait ordainsari-osagarriren berresleipena ebatzi du eta zenbait aurrekontu-aldaketa onartu ditu.